《夜王》：一場逝去的香港夜場舊夢

編按：標題由編輯部擬定。

我承認我係錯估或低估《夜王》。

其實由舊年《臨時決鬥》，到今年《金多寶》同《夜王》，都係用「賀歲喜劇」牌頭同宣傳策略，去包裝一部劇情片，《臨》係講信念，《金》係講親情，《夜》其實真正想講：愛情？

只覺得如果唔用「賀歲喜劇」格局作號召，甚至唔喺呢個檔期上，反而令觀眾能精準捉摸，唔會有市場期望落差，因為掛得「賀歲喜劇」牌頭，我期望係睇一啲對現實瘋狂嘲諷，或針對現實再瘋狂幻想，然後狂笑一餐.......不過又咁講，要好笑必然要貼地，必然要真，太離地冇可能再引人笑，但今時今日，好多真嘢又真係唔方便拎出嚟講......

所以三部片都有一個硬傷，就係笑料唔算真係太好笑，《夜》相對已較好，楊偉倫直情係MVP，無論節奏同肢體都一流，絕對有「子華接班人」之勢，但整體仍未算爆笑程度。

而《金》同《夜》，無論劇本同節奏，都有啲前後不太協調嘅尷尬，《夜》無疑野心更大，又有啲《金雞》式「見証香港夜場滄桑」，再插入一啲勉勵港人「金句」，然後又搞一場「大龍鳳天仙局」，令人諗起老西片《老千計狀元才》，或新藝城版《難兄難弟》，不過其實只算「小學雞」格局，亦未算堅緊湊.......而最後，其實佢最想講，係愛情，亦係拍得最細膩最感人最好睇嘅部份，或者有女編劇何妙祺發功嘅緣故，而Sammi正常發揮，廖子妤則超級爆發。

但整體仍走唔出《金雞》格局，有啲場口甚至少少熟口熟面，而喺處理笑位同感動位嘅節奏平衡上，又似乎未及前者......陳可辛喺呢方面，的確有獨特功架。

咁周星馳，就絕對獨步天下無人能及，笑位同感動位直接無縫融合，真正笑中有淚。

不過《夜》最大問題係，當年《金雞》早已講咗，夜總會黃金時代早已完結，阿金亦早已「上樓」......當現實中「大富豪2.0」上年都執埋笠，《夜》而家似係講緊一個早已逝去故事，甚至係：鬼故。

最後，好多人話黃子華演技唔得，我覺得佢只係被自己成名絕技所累，所謂「成也棟篤，敗也棟篤」，好多導演就係睇中佢口技，所以無論正劇《毒舌大狀》定《破地獄》，還是半喜劇《夜王》，都係要靠佢把口講出「金句」，咁自然就會令角色少咗人味......正所謂：「屌，都唔係人話嚟嘅......」但戲中佢有啲眼神同反應，都已經係交足戲。